Catrin Wager Plaid Cymru Bangor Aberconwy

Catrin Wager yw ymgeisydd Plaid Cymru dros Fangor Aberconwy i'r etholiad cyffredinol nesaf.  

Mae'n wleidydd ac ymgyrchydd profiadol hefo'i gwreiddiau mewn gweithredu'n gymunedol, ac mae ganddi dan i ymladd dros ddyfodol gwell. 

Hanes personol

Yn wreiddiol o Ddyffryn Nantlle, mae Catrin wedi byw yn Nyffryn Ogwen ers dros 20 mlynedd.  Mae'n fam i ddau o blant, ac yn ymgyrchydd brwd dros degwch cymdeithasol a'r amgylchedd.  

Cefndir proffesiynol

Mae Catrin wedi gweithio yn bennaf yn y trydydd sector, mewn meysydd addysg a chyfathrebu, gan fod wedi gweithio i fudiadau yn cynnwys yr Ymddiriedolaeth Genedlaethol, Canolfan Materion Rhyngwladol Cymru a Phartneriaeth Ogwen.  Bellach mae hi'n gweithio i gefnogi cymunedau i sefydlu Llyfrgelloedd Pethau; adnodd cymunedol sy'n ymateb ymarferol i'r argyfwng hinsawdd a'r argyfwng costau byw.  

Hanes gwleidyddol

Ar ôl blynyddoedd o ymgyrchu gwleidyddol ar faterion o'r argyfwng amgylcheddol i hawliau ffoaduriaid, camodd Catrin i fyd gwleidyddiaeth ffurfiol nol yn 2017, pan cafodd ei ethol fel Cyngorydd ward Menai, Bangor ar Gyngor Gwynedd.  Gweithredodd ar faterion megis cael gwared ar arwyddion 'To Let' ym Mangor a sefydlu grŵp i wyrddio a harddu'r ddinas, a daeth a chynigion llwyddiannus i'r cyngor yn galw am ddarparu nwyddau mislif am ddim mewn ysgolion, a datgan argyfwng hinsawdd.

Yn 2019 cafodd Catrin ei phenodi i'r cabinet, yn gyfrifol am feysydd yn cynnwys gwastraff ac ail-gylchu, priffyrdd, a llifogydd.  Arweiniodd ar gynlluniau atal llifogydd mawr, megis prosiect i adnewyddu amddiffynfeydd mor Hirael, a gweithredodd newidiadau yn unol â'i blaenoriaethau gwleidyddol, megis cyflwyno newidiadau i drefn cynnal ffyrdd i hyrwyddo blodau a bywyd gwyllt, ennill grant i gefnogi sefydlu oergelloedd cymunedol a chynlluniau rhannu bwyd ar draws y sir, a sefydlu timau tacluso ardal ni. 

Cafodd Catrin ei dewis fel ymgeisydd dros dro Plaid Cymru Arfon i etholiad San Steffan yn dilyn cyhoeddiad ymddeoliad Hywel Williams yn yr etholiad nesaf, a bu iddi gael ei dewis fel ymgeisydd Plaid Cymru Bangor Aberconwy ar gyfer yr etholaeth newydd yng Ngorffennaf 2023.